Ադրբեջանն էլ է մասնակցում բողոքի այս ակցիաներին
Արթուր Հայրապետյան
Սեպտեմբեր 30, 2021
Այսօր Սարի թաղի բնակիչները փակել են Դավիթ Բեկից 15-րդ, 16-րդ և 19-րդ փողոցներ տանող ճանապարհը:
Նրանք պահանջել են ամբողջությամբ ասֆալտապատել փոսերով լի այդ փողոցները, որից ոչ միայն իրենք են օգտվում, այլև Նորքի, Էրեբունու բնակիչները. այդ փողոցներով ավտոմեքենաները միանգամից հասնում են Խորենացի փողոց և Տիգրան Մեծ պողոտա:
«ՉԻ». Գիտեք, չէ՞, որ գրեթե ամեն օր Հայաստանի տարբեր հատվածներում ճանապարհներ են փակում՝ որպես իշխանությունների վարած կամ էլ չվարած քաղաքականության բողոքի նշան: Խաղողագործները, անասնապահները, ձկնորսները, անտառից փայտ բերողները... ով պատահի: Որ մի բան էլ ասում են, պատասխանում են՝ ինչի՞, Նիկոլին կարելի է, մեզ չի կարելի՞: Ու այդտեղ պապանձվում ես:
Հիմա Նիկոլ Փաշինյանը՝ ժամանակին իշխանության գալու համար ճանապարհներ էր փակում, հասել է այն վիճակին, որ ճանապարհ փակող քաղաքացիներին բան չի կարողանում ասել ոչ միայն այն պատճառով, որ ժամանակին ինքն էլ ճանապարհ է փակել, այլ նաև այն պատճառով, որ այդ մարդկանց առաջ քաշած պահանջների մեծամասնությունը արդարացի է: Ու այսպիսի բողոքի ակցիաները շուտով ամեն օր ու միանգամից մի քանի տեղ են լինելու:
Հ.Գ. Ամենահետաքրքիրն այն է, որ Ադրբեջանն էլ է մասնակցում բողոքի այս ակցիաներին՝ այստեղ ու այնտեղ ճանապարհ փակելով:
Չորրորդ իշխանություն
Կիսվել