Գարիկ Գալեյանը հիվանդանոցում է, վիճակը կայուն ծանր է

Արթուր Հայրապետյան Մայիս 19, 2022

Գարիկ Գալեյանը հիվանդանոցում է, վիճակը կայուն ծանր է

Արցախյան 44-օրյա պատերազմում զոհված Մխիթար Գալեյանի հոր՝ Գարիկ Գալեյանի վիճակը գնահատվում է կայուն ծանր։ Երևանի ընդհանուր իրավասության դատարանի Աջափնյակ նստավայրի դիմաց լրագրողների հետ զրույցում ասաց Գալեյանի փաստաբան Վահան Հովհաննիսյանը։

«Գարիկ Գալեյանը շարունակում է մնալ հիվանդանոցում։ Երեկ գիշերը փորձել են հարցաքննել, սակայն ի վիճակի չի եղել ցուցմունք տալ»,-ասաց փաստաբանը։

Հիշեցնենք, որ նահատակված հերոսի հոր առողջական վիճակը կտրուկ վատացավ նրան ձերբակալելուց հետո։ Ծանր վիճակում Գարիկ Գալեյանը տեղափոխվել է «Աստղիկ» ԲԿ։

Մեղադրանք է առաջադրվել նաև Գարիկ Գալեյանի եղբորը՝ Արթուր Գալեյանին։ Վերջինին կալանավորելու միջնորդություն է ներկայացվել, որը քիչ անց կքննի դատարանը։

Երեկ ԱԺ «Պատիվ ունեմ» խմբակցության ղեկավար Արթուր Վանեցյանը հայտարարեց, որ ինքը, պատգամավորներ Տիգրան Աբրահամյանն ու Արմենուհի Կյուրեղյանն անձնական երաշխավորություն են ներկայացրել խափանման միջոց հնարավոր կալանքը չկիրառելու համար։

Կիսվել