Մենք կհանդիպենք, երբ կհանդիպենք. կյանքից հեռացել է Զավեն Հարությունյանը

Արթուր Հայրապետյան Հունիս 02, 2022

Այսօր կյանքից հեռացել է «Դիպված» հաղորդաշարի հեղինակ եւ վարող Զավեն Հարությունյանը: Հոգեհանգստը տեղի կունենա վաղը՝ հունիսի 3-ին, ժամը` 18 :00-ին «Եդեմ» սգո սրահում: Հողարկավորությունը՝ հունիսի 4-ին, ժամը` 13 :00-ին:

Հիշեցնենք, որ նա 1960 թվականից ներգրավված էր հայկական հեռուստատեսության տարբեր ծրագրերում, դերակատարումներով մասնակցել է մանկական ներկայացումներին, «ABC» երիտասարդական, «Ֆրանսերենի հեռուստադպրոց» հաղորդաշարերին։

Կազմակերպել է մշակութային տարաբնույթ միջոցառումներ։ Հեղինակել է բազմաթիվ գիտական հոդվածներ, գիտա-մեթոդական աշխատություններ, ուսումնական ձեռնարկներ։ Վերապատրաստվել է Ֆրանսիայի Գրենոբլ քաղաքի համալսարանում եւ ստացել էստրադային ռեժիսորի մասնագիտություն։

Իրականացրել է բազմաթիվ մասշտաբային միջոցառումներ, ամանորյա, հոբելյանական երեկոներ՝ «Փարիզյան էսքիզներ», «Պատնեշ», «Բոհեմ», «Վերջին սկիզբ` Սիմոն Տերյան», «Արամ Սաթյան» եւ այլն։

2002 թվականին Հայաստանի Հանրային հեռուստաընկերությամբ հեղինակել եւ վարել է «Ակնթարթ» ծրագիրը։ 2003 թվականից «Կենտրոն» հեռուստաընկերությամբ հեղինակում եւ վարում էր «Դիպված» հաղորդաշարը։

Կիսվել